ಸಗ್ಳೊ ಹಫ್ತೋ ದೇವ್ ಸ್ತುತಿ ಚಲವ್ನ್ ವ್ಹೆಲ್ಲ್ಯಾ ತಶೆಂಚ್ ಸ್ವಯಂಸೇವಕ್ ಜಾವ್ನ್ ಮಿಸಾಚಿ ಶಿಸ್ತ್ ಪಾಳ್‍ಲ್ಲ್ಯಾ ಲ್ಹಾನ್ ಫುಲ್ ವಾಡ್ಯಾಗಾರಾಂಕ್ ದೇವ್ ಬರೆಂ ಕರುಂ. ಸೊಮಾರಾ ಥಾವ್ನ್ ಸನ್ವಾರಾ ಪರ್ಯಾಂತ್ ದೇವ್‍ಸ್ತುತಿ ಬಾಳ್ ಮರಿ ವಾಡ್ಯಾಗಾರಾಂನಿ ಕರ್ಚಿ. ತಶೆಂಚ್ ಬಾಳ್‍ಮರಿ ವಾಡ್ಯಾಚ್ಯಾ ಭುರ್ಗ್ಯಾಂನಿ ವೆದಿ ಸೆವಾ ಕರ್ಚಿ. ಯೆಂವ್ಚ್ಯಾ ಆಯ್ತಾರಾ ಪಯ್ಲ್ಯಾ ಮಿಸಾಕ್ ಐಸಿವೈಯಮ್ ಸಾಂದ್ಯಾನಿ ಆನಿ ದುಸ್ರ್ಯಾ ಮಿಸಾಕ್ ಸವ್ಯಾ ಕ್ಲಾಸಿಚ್ಯಾ ಭುರ್ಗ್ಯಾಂನಿ ದೇವ್ ಸ್ತುತೆಕ್ ಮಾಂಡಾವಳ್ ಕರ್ಚಿ.
ಆಜ್ ಸಾಂಜೆರ್ ಪವಿತ್ರ್‍ಸಭೆಚೆಂ ಮಾಗ್ಣೆಂ ಆನಿ ಆರಾಧಾನ್ ಆಸಾ. ಹ್ಯಾ ಪ್ರಾಚಿತ್ ಕಾಳಾರ್ ಸಾಂಜೆಚೊ ಥೊಡೊ ವೇಳ್ ದೆವಾಚಾ ಹಾಜರ್ಪಣಾಂತ್ ಖರ್ಚುಂಕ್ ವಿನಂತಿ ಕರ್ತಾಂವ್.
ಸೊಮಾರಾ ಪಿಡೆಸ್ತಾಂಕ್ ಕುಮ್ಗಾರ್ ಹಾಡ್ನ್ ಯೆತೆಲ್ಯಾಂವ್. ಘರಾಂನಿ ಜೊಕ್ತಿ ತಯಾರಾಕ್ ಕರ್ಚಿ.
-ಯೆಂವ್ಚೊ ಸುಕ್ರಾರ್ ಮಹಿನ್ಯಾಚೊ ಪಯ್ಲೊ ಸುಕ್ರಾರ್. ಸಾಂಜೆಚಾ ಖುರ್ಸಾವಾಟೆ ಉಪ್ರಾಂತ್ ಆರಾಧಾನ್ ಆನಿ ಉಪ್ರಾಂತ್ ಮೀಸ್ ಆಸ್ತೆಲೆಂ.
-ಫಾಲ್ಯಾಂ ಭುರ್ಗ್ಯಾಂಚಾ ಮಿಸಾ ಉಪ್ರಾಂತ್ ಆಲ್ತಾರ್ ಭುರ್ಗ್ಯಾಂಚಿ ಜಮಾತ್ ಆಸ್ತೆಲಿ.
ಹ್ಯಾ ಹಫ್ತ್ಯಾಂತ್ ಘರಾ ಬೆಜ್ಮೆಂತಾ ಮಾರ್ಚಾಚಾ 1 ಆನಿ 2 ತಾರಿಕೆರ್ ಸೊಮಾರಾ ಆನಿ ಮಂಗ್ಳಾರಾ ಬಾಳ್ ಮರಿ ವಾಡೊ, 3 ತಾರಿಕೆರ್ ಬುದ್ವಾರಾ ಕಾರ್ಮೆಲ್ ವಾಡೊ, 4 ತಾರಿಕೆರ್ ಬ್ರೇಸ್ತಾರಾ ವೆಲಂಕಣಿ ವಾಡೊ. ಘರ್ ಬೆಜ್ಮೆಂತಾ ವೆಳಾರ್ ಘರ್ ನಿತಳ್ ದವರ್ಚೆಂ. ಘರ್ಚ್ಯಾ ಸಾಂದ್ಯಾಂನಿ ಹಾಜರ್ ಆಸ್ಚೆಂ. ವಾಂಜೆಲಾಚೆ ವಾಚಾಪ್ ಪಯ್ಲೆಂಚ್ ದಿತಾಂವ್ ಜಾಲ್ಲ್ಯಾನ್ ತಾಚಿ ತಯಾರಾಯ್ ಕರ್ಚಿ. ತಶೆಂಚ್ ಪವಿತ್ರ್‍ಸಭೆ ಖಾತಿರ್, ಕುಟ್ಮಾಂತ್ಲ್ಯಾ ಸಾಂದ್ಯಾ ಖಾತಿರ್, ಕುಟ್ಮಾಂತ್ ದೆವಾಧಿನ್ ಜಾಲ್ಲ್ಯಾ ಸಾಂದ್ಯಾ ಖಾತಿರ್, ಕುಟ್ಮಾಂಚಾ ಖಾಸ್ಗಿ ಗರ್ಜಾಂ ಖಾತಿರ್ ಪ್ರಾರ್ಥನಾಂ ಕುಟ್ಮಾಚಾ ಸಾಂದ್ಯಾಂನಿ ಬರೊವ್ನ್ ದವರ್ಚಿ ಆನಿ ಜೊಕ್ತ್ಯಾ ವೆಳಾರ್ ವಾಚುಂಕ್ ವಿನಂತಿ.
ಫಿರ್ಗಜ್ ಪತ್ರ್: ಬಜ್ಜೋಡಿಚೊ ಕುರೊವ್ ಪಾಸ್ಕಾಂ ಫೆಸ್ತಾಚ್ಯಾ ಅಂಕ್ಯಾಕ್ ಕವನಾಂ, ಲೇಕನಾಂ, ಪಿಂತುರಾ, ಲ್ಹಾನ್ ಕಾಣಿಯೊ ಬರೊವ್ನ್ ದಿಂವ್ಚೊ. ಜಲ್ಮಾದೀಸ್, ಕಾಜಾರ್ ತಶೆಂಚ್ ಜುಬ್ಲೆವಾಚೆ ಉಲ್ಲಾಸ್ ಪಾಟವ್ನ್ ಜಾಹೀರಾತಾಂ ಮಾರ್ಚಾಚಾ 15 ತಾರಿಕೆ ಭಿತರ್ ದೀಂವ್ಕ್ ವಿನಂತಿ.
ಕೊರೊನಾ ಪಿಡಾ ನಿಯಂತ್ರಣಾಕ್ ಆಯ್ಲೆಲ್ಯಾ ವರ್ವಿಂ ವಾಡ್ಯಾಂತ್ ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಜಮಾತ್ಯೊ ಕರ್ಯೆತ್ ಮ್ಹಣ್ ಗೊವ್ಳಿ ಬಾಪಾನಿಂ ತಿಳ್ಸಿಲಾಂ. ದೆಕುನ್ ಮಾರ್ಚ್ ಮಹಿನ್ಯಾಂತ್ ಥಾವ್ನ್ ಹ್ಯೊ ಜಮಾತ್ಯೊ ಚಲ್ತಲ್ಯೊ. ಹಾಕಾ ತಯಾರಾಯ್ ಜಾವ್ನ್ ಯೆಂವ್ಚ್ಯಾ ಸುಕ್ರಾರಾ ಸಾಂಜೆಚಾ ಮಿಸಾ ಉಪ್ರಾಂತ್ ಪ್ರೇರಕಾಂಚಿ ಜಮಾತ್ ಆಸ್ತೆಲಿ. ಹರ್ಯೇಕಾ ವಾಡ್ಯಾ ಥಾವ್ನ್ ಪ್ರೇರಕಾನ್ ತಶೆಂಚ್ ಲ್ಹಾನ್ ಕ್ರೀಸ್ತಾಂವ್ ಸಮುದಾಯ್ ಸಮಿತಿಚಾ ಸಾಂದ್ಯಾಂನಿ ಹಾಜರ್ ಜಾಂವ್ಕ್ ವಿನಂತಿ.
ಮಾರ್ಚಾಚಾ 14 ತಾರಿಕೆರ್ ಸಾಂಜೆರ್ 7ವೊರಾರ್ ತೈಝೆ ಮಾಗ್ಣ್ಯಾವಿಧಿ ಆಸ್ತೆಲಿ. ಗಾಯನ್ ಮಂಡಳಿ ಆನಿ ಐಸಿವೈಎಮ್ ಸಾಂದ್ಯಾಂನಿ ಮಾಗ್ಣ್ಯಾವಿಧಿ ಚಲವ್ನ್ ವ್ಹರ್ಚಿ.
ಪಾಸ್ಕಾಂ ಫೆಸ್ತಾಕ್ ತಯಾರಾಯ್ ಜಾವ್ನ್ ಪ್ರಾಚಿತ್ ಕಾಳಾರ್ ಫಿರ್ಗಜ್ ಕುಟ್ಮಾಕ್ ವಾರ್ಶಿಕ್ ರೆತಿರ್ ಮಾರ್ಚ್ 19, 20, 21 (ಸುಕ್ರಾರ್, ಸನ್ವಾರ್, ಆಯ್ತಾರ್) ಸಾಂಜೆರ್ 4 ಥಾವ್ನ್ 8.30 ವೊರಾಂ ಪರ್ಯಾಂತ್ ಆನಿ ಆಯ್ತಾರಾ ದೊನ್ಪಾರಾ ಪರ್ಯಾಂತ್ ರೆತಿರ್ ಆಸ್ತೆಲಿ. ಪಕ್ಷಿಗೆರೆಚೆ ವಿಗಾರ್ ತಶೆಂಚ್ ಉತ್ತೀಮ್ ಪ್ರಸಂಗ್‍ದಾರ್ ಬಾಪ್ ಮೆಲ್ವಿನ್ ನೊರೊನ್ಹಾ ಹಿ ರೆತಿರ್ ಚಲವ್ನ್ ವ್ಹರ್ತಲೆ. ಸರ್ವಾಂನಿ ರೆತಿರೆಕ್ ಹಾಜರ್ ಜಾವ್ನ್ ಪಾಸ್ಕಾಂ ಫೆಸ್ತಾಕ್ ಆತ್ಮಿಕ್ ತಯಾರಾಕ್ ಕರ್ಚಿ.
ಮೇ ಮಹಿನ್ಯಾಚ್ಯಾ 15 ಆನಿ 16 ತಾರಿಕೆರ್ ಕ್ರಿಜ್ಮ್ ಅನಿ ಗೊವ್ಳಿಕ್ ಭೆಟ್ ಆಸ್ತೆಲಿ. ಹ್ಯಾ ದೋನ್ ದಿಸಾ ಹೆರ್ ಖಂಚಿಚ್ಚ್ ಕಾರ್ಯಕ್ರಮ ಆಸಾ ಕರಿನಾಸ್ತಾನಾ ರಾವುಂಕ್ ವಿನಂತಿ ಕರ್ತಾಂವ್.
ಆಜ್ ದುಸ್ರ್ಯಾ ಮಿಸಾ ಉಪ್ರಾಂತ್ ಹ್ಯಾ ವರ್ಸಾ ಕ್ರಿಜ್ಮಾಚೊ ಸಾಕ್ರಾಮೆಂತ್ ಸ್ವೀಕಾರ್ ಕರ್ಚ್ಯಾ ಭುರ್ಗ್ಯಾಂಕ್ ತಶೆಂಚ್ ತಾಂಚ್ಯಾ ವಡಿಲಾಂಕ್ ಜಮಾತ್ ಆಸ್ತೆಲಿ. ಪ್ರಸ್ತುತ್ ನೊವಿ, ಧಾವಿ, ಪಿಯುಸಿ ತಶೆಂಚ್ ಕೊಣಾಕ್ ಕ್ರಿಜ್ಮ್ ಮೆಳೊಂಕ್ ನಾ ತಾಣಿಂ ಹಾಜರ್ ಜಾಂವ್ಚೆಂ. ತಶೆಂಚ್ ತುಮ್ಚೊ ಆಶೆಂತ್ ಹಾಡ್ನ್ ಯೆಂವ್ಕ್ ವಿನಂತಿ.
ಫಾಲ್ಯಾಂ ಭುರ್ಗ್ಯಾಂಕ್ ಕ್ರೀಸ್ತೀ ದೊತೊರ್ನಿಚಿ ಪರೀಕ್ಷಾ ಆಸ್ತೆಲಿ. ಭುರ್ಗ್ಯಾಂನಿ ವೆಳಾರ್ ಹಾಜರ್ ಜಾಂವ್ಚೆ. ಮಾರ್ಚ್ 7ತಾರಿಕೆರ್ ಫಲಿತಾಂಶ್, ಮೌಲ್ಯ್‍ಮಾಪನ್ ತಶೆಂಚ್ ಭುರ್ಗ್ಯಾಂಕ್ ಕುಮ್ಸಾರಾ ಆಸ್ತೆಲಿಂ. ಮಾರ್ಚಾಚಾ 14 ತಾರಿಕೆರ್ ದೊತೊರ್ನಿಚೊ ದೀಸ್. ತ್ಯಾ ದಿಸಾ ಮಿಸಾ ಉಪ್ರಾಂತ್ ಭುರ್ಗ್ಯಾಂಕ್ ಇನಾಮಾಂ ವಾಂಟ್ತೆಲ್ಯಾಂವ್. ಇನಾಮಾಂಚೊ ಐವನ್ ಸ್ಪೋನ್ಸರ್ ಕರುಂಕ್ ಮನ್ ಆಸ್‍ಲ್ಲ್ಯಾಂನಿ ವಿಗಾರ್ ಬಾಪಾಂಕ್ ಭೆಟ್ಚೆಂ.